Matunog nga ginabati-bati nga tanyagan sang Boston Celtics si Jayson Tatum sang record-breaking contract nga amo ang ginalantaw mangin pinakamataas sa maragtas sang National Basketball Association (NBA).
Sandig sa pila ka nagaguluwa nga reports, posible nga five-year $315 million ukon P18.51-billion extension ang offer sa 26-anyos nga superstar kag natalana nga iga-anunsyo kadungan sang championship parade subong nga semana.
Nahibaluan nga nakumpleto sini ang ikatatlo nga tuig sang iya nga five-year $163 million ukon P9.58-billion extension nga ginpirmahan sini sa Boston sang 2020 nga may nalakip nga player option para sa final year.
Eligible si Tatum sa supermax extension bangud nahingadlan ini sa All-NBA team sa past season nga nag-angkon sang first team honors kaupod kanday Nikola Jokic, Luka Doncic, Giannis Antetokounmpo, kag Shai Gilgeous-Alexander.
May average siya nga 26.9 points off 47 percent shooting sa 74 games sa regular season kag nahingadlan sa iya ikalima na nga sunod-sunod nga All-Star roster kag nagpang-anum sa NBA MVP voting.
Ginpangunahan man sini ang Celtics paagi sa 25.0 points, 9.7 rebounds, kag 6.3 assists per game sa playoffs kag gintib-ong ang Boston agud mahakwat ang ika-18 nga kampyonato sang prangkisa sa NBA.
Antes ini nga reports para kay Tatum, matandaan nga sang nagligad nga summer, si Jaylen Brown nga amo subong ang Finals MVP amo ang nag-set sang NBA record sang ginpirmahan sini ang $300 million ukon P17.63-billion max extension.
