ILOILO CITY – Magahatag dugang nga duag sa opening ceremony sang Palarong Pambansa 2017, Abril 23, Dominggo, ang pila ka mga Ilonggo celebrities.
Sa interview sang Bombo Radyo Iloilo, ginpahayag ni Atty. Arthur Lastimoso, chairperson sang local organizing committee sang Palarong Pambansa, ginkuha nga mag-perform ang mga singers nga sanday Jed Madela kag Joshua Oliveros.
Si Oliveros ang winner sang “The Voice Kids Season 3” nga tumandok sang probinsiya sang Antique samtang ang multi-awarded singer naman nga si Madela ang nagikan sa Iloilo City.
Magluwas sa mga celebrities, ginpahayag ni Atty. Lastimoso nga gin-imbitaran nila ang Athletics legend nga si Elma Muros-Posadas.
Pasidunggan si Muros sang Palaro Lifetime Achievement Award.
Si Muros ang kilala nga track and field athlete partikular sa long jump kun sa diin siya nakakuha sang walo ka mga titulo Southeast Asian Games.
Ang ginbansagan “Heptathlon Queen” ang nakadaog sang 15 ka gold medals sa Southeast Asian Games kag anay kaupod sang isa man ka legendary athlete nga si Lydia de Vega.