Iloilo City – Tuman nga naapektuhan ang pila ka mga jeepney drivers sa sunod-sunod nga pagpatuman sang oil price hike sa pungsod.
Sa interview sang Bombo Radyo kay Alejandro Gahardo, driver sang Ungka-Diversion, iya ginpahayag nga napilitan ini magpatughong apisar wala na sang inug-ginansya bangud sa padayon nga oil price hike.
Suno kay Gahardo, wala man ini sang sarang mahimo kag nagalaum na lang nga madamo ang iya makuha nga pasahero.
Ginpahayag dugang sang natungdan nga nagaarkila ini sang jeep sang P550 kag ang malimpyo sini kag madala pauli ang yara lang sa P300 tubtob P500 nagikan sa iya pasada.
Nahibaluan nga ini na ang ikaapat nga round sang oil price adjustments subong nga 2023 kun diin ang gasolina ang nagsaka sang P2.80 kada litro, ang diesel ang nagsaka sang P2.25 kada litro, kag ang kerosene sang P2.40 kada litro.
