Ginpakamalaot ni self-confessed whistleblower Jeffey Celiz ukon “Ka Eric Almendras” ang pagpang red tag ni Armed Forces of the Philippines (AFP) deputy chief of staff for intelligence Maj. Gen Alex Luna matapos nagpaggwa sang lista sang University of the Philippines (UP) Alumni nga ginpahayag nagsulod sa New People’s Army.
Una na nga gintawag ni Defense Secretary Delfin Lorenzana nga isa ka “unforgivable lapse” ang pagpangred tag ni Luna sa mga estudyante sang UP.
Sa exclusive interview sang Bombo Radyo kay Celiz, Research Consultant sang National Task Force to End Local Communist Armed Conflict (NTF-ELCAC), iya ginpahayag nga husto man nga manabat ang pinuno sang AFP bangod indi updated ang mga pangalan sang UP Alumni nga ginpaggwa kag wala sang consultation nga natabo sa ila nga mga former cadre.
Suno kay Celiz, ginabanta 80 percent ang insakto kag 20 percent lang ang mga pangalan nga daan na kag kinahanglan i-validate.
Gin-athag man ni Celiz nga base sa sunod-sunod nga impormasyon nga ginpaggwa sang AFP, nakita nila nga husto ang mga pangalan nga naghalin mismo sa mga recovered materials sang mga top leaders sang CPP-NPA-NDF.
Apang apisar sini, nagakadapat suno kay Celiz nga maging mahinalungon ang mga kabahin sang gobyerno sa pagpaggwa sang mga impormasyon.
Kinahanglan suno kay Celiz nga may direct interview kag direct conference sa mga anay cadre agud nga makahatag sila sang insakto kag validated nga mga impormasyon.
“Dapat balikan nila kami pirmi nga mga former cadre kag mga research consultants nila so that mangin validated kag tama nga framework, tama nga eksperyensya kag tama nga kasaysayan ang amon ma provide sa ila..”
