ILOILO CITY- Ginkumpormehan ni National Task Force to End Local Communist Armed Conflict consultant nga si Jeffrey Celiz ang ginpangbuy-an nga mga pahayag ni Police LtCol Jovie Espenido nga ang PNP amo ang pinakadako nga crime group.
Sa ginpatigayon nga joint public hearing sang House Quad Committee, gin-akusahan man ni Espenido sang korapsyon ang national police kag may high-ranking officers nga protektor sang major drug cartels.
Sa interview sang Bombo Radyo kay Celiz, iya ginpahayag nga siya mismo ang nakasaksi sadto sa mga transakyon sa tunga sang mga durugista kag mga opisyal sang law enforcement agencies.
Ginpangalanan sini ang Philippine National Police kag Philippine Drug Enforcement Agencies nga nagapanguna gid sa pagbaton sang kwarta halin sa drug groups.
Suno kay Celiz, P2 million kada semana ang taripa sa Regional Directors sang amo nga mga ahensya samtang P700,000 tubtob P1 million naman ang taripa para sa City director kag Provincial directors.
Pahayag pa niya, police man ang kolektor sang kwarta kag ginapatigayon ini sa gwa sang syudad.
Namalibad naman ini nga pangalanan ang nasambit nga mga high- ranking officials sa nasambit nga mga ahensya.
