Jeffrey Celiz, nakapyansa na sa duha ka mga kaso nga ginpasaka sang NBI

Nag-mosyon ang kampo sang Ilonggo social media personality nga si Jeffrey “Ka Eric” Celiz nga ibasura sang korte ang kaso nga cyberlibel nga gin-file sang National Bureau of Investigation (NBI) batok sa iya kag kay Jay Sonza.

Sa interview sang Bombo Radyo kay Celiz, iya ginpahayag nga nagpasa sila sang motion to quash information sa Pasay City Regional Trial Court kadungan sang pag-apruba sang korte sang bail application nila ni Sonza.

Suno kay Celiz, ginsumite ang mosyon bangud suno sa iya, sala ang kaso, may isyu sang hurisdiksyon, kag dapat nga personal ang nag-file sang kaso kag wala dapat ginpaagi lang sa NBI.

Pahayag sini, dapat nga si President Ferdinand “Bongbong” Marcos, Jr. ang nagpasaka sang kaso nga cyberlibel sa baylo nga saluon sang NBI bangud indi man sila ang ginapatuhuyan sang komentaryo.

Antes nagpyansa sa kaso nga cyberlibel, nag-surrender naman si Celiz sa Regional Trial Court Branch 119 sa Pasay City kag nagpyansa man sang P36,000 bangud sa kaso nga unlawful use of means of publication.

Matandaan nga sang Pebrero sang ginpasaka sang NBI ang kaso nga unlawful publication kag cyberlibel batok kanday Celiz kag Sonza matapos na-document sang NBI agents ang online posts sang Enero 28 kag 29 nga ginaalegar nagpakita sang supposed CT-scan report nga tupad sang mga laragway ni Marcos.

Sang una nga interview sang Pebrero, nagpahayag si Celiz sa Bombo Radyo nga wala siya sang ginpaguwa nga peke nga medical nga dokumento nga may detalye nahanungod sa kahimtangan sang presidente.

Suno sa iya, ang iya lamang ginpaguwa amo ang iya reaksyon base sa opisyal nga pahayag sang Malacañang nga naospital si Marcos.

Ginpanindugan man ni Celiz nga indi pribado nga persona ang presidente, kag bangod siya ang nagapungko nga lider sang pungsod, ang iya kahimtangan isa ka seryoso nga isyu nga may nasyonal nga interes.#