ILOILO CITY- Nanindugan si National Task Force to End Local Communist Armed Conflict consultant nga si Jeffrey Celiz nga wala nagabaton si former Iloilo City Mayor Jed Patrick Mabilog sang kwarta halin sa druga.
Si Celiz ang kabahin sang political consultant team ni Mabilog humalin sang 2013 sa ikaduha sini nga termino tubtob sa ikatatlo nga termino sa idalom sang administrasyon ni anay Presidente Rodrigo Duterte sang 2016.
Sa interview sang Bombo Radyo kay Celiz, iya ginpahayag nga antes pa man nangin alkalde si Mabilog, malala na ang sitwasyon sang druga sa syudad.
“I will tell the world…wala gabaton sang kwarta halin sa druga si Mabilog kag Treñas. Kun may accountability on their part, lalo na kay Mabilog, ang iya negligence of duty. Kay man bal-an ta man ang mga barangay kapitan, utod sang dalagko nga drug personalities.”-Celiz
Suno kay Celiz, natapik lamang ang pangalan ni Mabilog sa narcotics trade bangud man sa negligence sa bahin sang anay mayor bangud nga madamo man nga barangay officials ang konektado ukon pamilya sang mga dalagko nga drug personalities kag ini ang napabay-an sang anay alkalde.
