Malapit na lang ang tigkalalag!
Sigurado nga lain-lain naman nga mga pakulo ang ginahanda, pareho man sa pagkaon nga ginabantayan gid sang mga bata kag tigulang kada tuig.
Halimbawa, sa Texas, isa ka pizzeria ang ginapakamalaot subong sang publiko bangud sang paghimo sang pizza nga inspired sa serial killer nga si Jeffrey Dahmer.
Si Dahmer amo ang serial killer nga nagpatay sa 17 ka mga lalaki sang 1978 tubtub sang 1991 sa Milwaukee. Nakaako pa ini nga ginkaon niya ang iban nga parte sang lawas sang iya mga biktima.
Ginakilala man siya bilang Milwaukee Monster kag Milwaukee Cannibal.
Na-preso siya kag napatay sang 1994 matapos nga ginkastigo sang isa man ka preso sa Portage, Wisconsin.
Bangud Halloween season, nag-desisyon ang isa ka pizza restaurant sa northwest Texas nga i-butang bilang isa ka store display ang pizza nga ginatawag “Jeffrey Dahmer Special”.
Lakip sa features sini amo ang prop pizza crust nga covered sang peke nga dugo kag iban pa nga parte sang lawas sang tawo kaangay sang eyeball, utod nga tudlo sang tawo, kag ramen noodles nga amo ang naga-represent sang intestines.
Kun ang restaurant workers ang pahambalon, ginhimo lang ini in line sa “spooky season”, apang lain naman ang reaksyon sang mga tawo.
Para sa iban nga kustomer, insulto ini sa mga pamilya sang nabiktima ni Dahmer.
Ginlaragway man ini sang iban nga disgusting kag indi kaladlawan.
Apisar sang negatibo nga feedback, desidido ang establisyemento nga taguon lamang ini sa ila nga storage room kun matapos na ang Halloween.
May yara man sang series nga ginhimo nga nagapakita sang killing spree ni Dahmer; apisar nangin popular ini sa publiko, may negatibo man ini nga reviews bangud pila sa mga pamilya sang biktima ni Dahmer ang nagsiling nga wala man sila ginkonsulta antes ginpaguwa ang amo nga series.
