Plano ni Justin Brownlee nga ipa-auction ang iya ginsuksok nga jersey kag sapatos sang ginpangunahan sini ang maragtason nga paglutos sang Gilas Pilipinas sa anay reigning champion nga China sa men’s basketball sa Asian Games sang Oktubre 2023.
Suno kay Brownlee, ang matipon nga kuwarta sa auction ang igahatag sini sa charities.
Magluwas sa jersey kag shorts, ilakip man ni Brownlee sa auction ang Nike Kobe 8 Protro “Halo” shoes nga iya gingamit.
Pahayag pa sang three-time PBA Best Import, gusto niya nga mag-umpisa ang bidding sa P2.5 million kag gusto man niya nga madamo nga tawo ang magabulig para sa mga nagakinahanglan.
Ginakabig sini ang hampang batok sa China sa semifinals nga amo ang isa sa iya pinakapaborito nga hampang para sa Pilipinas.
Matandaan nga ang paglutos sang Gilas sa China sa isa gid lamang ka puntos amo ang nangin paagi agud nga makalab-ot ang Pilipinas sa finals kun sa diin ginlutos man sini ang team sang Jordan kag nahatag sa mga Pilipino ang labing-una nga korona sa men’s basketball sa Asian Games halin sang 1962.
Sang tion nga nag-atubangay ang Gilas kag China, wala gid naka-abanse ang Pilipinas halin sa una nga quarter sang hampang apang ginbubo ni Brownlee ang bug-os nga pwersa sa fourth quarter.
Halin sa 20 puntos nga abanse sang kasumpong, 17 sa 33 puntos sang naturalized player ang ginpaulan sa final frame antes nakuha sang mga Pinoy ang makahalawat-hawat nga 77-76 nga kadalag-an sa atubang mismo sang linibo nga Chinese fans.
Halin sang Asian Games, subong naman nga Pebrero 2024 nakapakita si Brownlee sa Pilipinas bangud naglagbong ini sa doping test apang nakabalik na sa pungsod kag magabulig liwat sa Gilas sa first window sang FIBA Asia Cup Qualifiers subong nga bulan. #
