Pareho nga knockout ang target sang Filipino champion nga si Melvin Jerusalem kag Mexican challenger nga si Luis Castillo sa ila pagkitaay agud agawan ang World Boxing Council (WBC) minimumweight crown.
Matabo ang sambuwa sa Domingo, Septyembre 22, sa Mandaluyong City College.
Wala sang gin-mensyonar si Castillo kun ano nga round sini matumba ang Pinoy boxer, apang ginsiling sini nga kumpyansa siya nga madala-pauli ang korona sa Mexico.
Wala sang kalutusan ang 27-anyos nga southpaw sa 21 sini ka hampang, may 13 ka knockouts kag isa ka draw kag ginalantaw man nga gamiton sini ang height kag reach advantage batok kay Jerusalem.
Gamiton naman ni Jerusalem ang iya natun-an sang una nga tion sini nga gintinguhaan nga depensahan ang iya World Boxing Organization (WBO) mini flyweight belt sang 2023 apang nalutos.
Kumpyansa naman ang pambato sang Pilipinas nga nabasa na sini ang hulag sang kasumpong bangud madugay sini nga gin-sulit-sulit ang iya mga hampang.
Espesyal ang sambuwa sang duha bangud ini ang una nga world title fight sa Pilipinas sa sulod sang pito ka tuig.
Ini man ang una nga title defense sang Pinoy boxer sa kaugalingon nga pungsod, partikular para sa WBC belt, halin sang nadepensahan ni Manny Pacquiao ang iya WBC flyweight crown batok anay kay Gabriel Mira sang Mexico sa Araneta Coliseum sang 1999.
