Magapadulong na sa Japan subong nga adlaw, Pebrero 18, ang Pinoy boxer nga si Jerwin Ancajas agud maghanda para sa sambuwa sini batok kay Japanese World Boxing Association (WBA) bantamweight champion Takuma Inoue sa Tokyo sa Pebrero 24.
Suno sa 32-anyos nga boksidor nga amo ang challenger sa sini nga hampang, nagalaum siya kag ang iya kampo nga indi na mag-ilis sang istilo si Takuma pag-abot sa hampang.
Pahayag pa sini, nakit-an niya nga indi malawig ang pasensya sang Japanese boxer pag-abot sa ring rason nga naga-agresibo gilayon sa tion nga maigu ini sang inumol.
Apisar nga underdog si Ancajas ukon si Pretty Boy sa sini nga sambuwa, nagalaum siya makuha ang titulo agud nga may world champion na liwat ang Pilipinas sa boksing.
Si Ancajas ang naga-uyat anay sang International Boxing Federation (IBF) junior bantamweight crown halin sang 2016 tubtub sang 2022 antes ini nalutos sang duha ka beses sa kamot ni Fernando Martinez sang Argentina.
Si Takuma naman, 28, amo ang manghod sang Japanese undisputed super-bantamweight king nga si Naoya Inoue.
May 18 ka daog kag isa ka kalutusan si Takuma kun sa diin apat ang iya na-knockout samtang mas eksperyensyado naman si Ancajas sa sulod sang ring nga may 34-3-2 rekord kun sa diin 23 ang na-knockout.
Una nga na-schedule ang away sang duha sang Nobyembre apang na-postpone bangud sa injury ni Takuma sa training.#
