Nakahanda ang Jhelord Taxi Management nga maggasto sang mga bills sa mga biktima lakip na ang duha ka mga napatay sa nagluntad nga insidente sa Barangay Bolong Este, Sta. Barbara, Iloilo.
Ini kasunod sang pagbunggo sang taxi sa isa ka bus (CBL) nga nagatuyo magliko sa U-turn slot.
Ang mga biktima amo sanday Jomar Senerado, 39-anyos, sang Barangay Nadsadan, San Joaquin, Iloilo, driver sang Jhelord Taxi.
Nadalasa man sa aksidente ang nagakabit sa jeep nga Jeric Hualde Huyo, 29-anyos sang Barangay Ito Sur, Cabatuan.
Sa interview sang Bombo Radyo kay Rodrigo Muyco Baculado, Operation Manager sang Jhelord Taxi corporation, iya ginpahayag nga ginahulat sang ila talatapan nga maguwa ang police report agud nga matumod ang balor sang danyos nga ila ibulig sa mga biktima.
Suno kay Baculado, indi pa sila kongkreto nga makapaguwa sang presumptions nahanungod sa insidente bangud mahimo makatuga ini sang dugang pa nga problema.
Ginalantaw naman sang natungdan nga ‘pure accident’ ang natabo kag indi man sini mabasol ang driver bangud isa man ini sa mga nagpatay kasunod sang insidente.
Gintuad man ni Baculado nga naka-first trip pa ang driver sang taxi kag nagapati ini nga yara ini sa insakto nga panghuna-huna.
Nahibaluan nga wasak gid ang taxi lakip na ang unahan nga bahin sang bus matapos nakabunggo sa de-pampasahero nga jeep sang Janiuay kon sa diin, nahapit sini ang nagakabit nga pasahero kag nadalasa.
