Ginhingadlan ang anay Creamline Cool Smashers star nga si Jia Morado-De Guzman bilang team captain sang Alas Pilipinas national women’s volleyball team para sa AVC Challenge Cup for Women.
Ini nga development ang gin-anunsyo sang Philippine National Volleyball Federation subong nga weekend.
Si De Guzman ang kilala man anay nga Ateneo captain nga sang ulihi nangin eight-time Best Setter sa PVL kag nakahampang naman sa national team para sa nagligad nga tournaments.
Makaupod sini nga magatiglawas sa Pilipinas amo ang bataon pa nga volleyball stars nga sanday Angel Canino, Thea Gagate, kag Julia Coronel; amo man ang mainstays sa PVL nga sanday Sisi Rondina kag Cherry Nunag sang Choco Mucho, Eya Laure kag Jen Nierva Chery Tiggo, Fifi Sharma kag Faith Nisperos sang Akari, Dawn Macandili-Catindig kag Vanie Gandler sang Cignal, kag Dell Palomata sang PLDT.
Nalakip man sa ginpangalanan sa national team si Casiey Dongallo apang indi ini maka-intra sa tournament bangud sa injury.
Balantayan ang AVC Cup sa Mayo 22-29 sa Rizal Memorial Coliseum sa Vito Cruz, Manila kun sa diin una nga makaatubang sang Pilipinas sa Huwebes, Mayo 23, ang team sang Australia.
