ILOILO CITY – “He is a very good disciplinarian, pero wala siya nakaagi sang panakit.”
Ini ang depensa ni Dr. Belinda Dinupol, principal sang Jaro National High School, sa assistant choreographer sang Tribu Salugnon nga gina-alegar nagpulpog sang microphone sa mga estudyante nga iya ginahanas kag nagresulta sa pagdugo kag pagbukol sa ila mga ulo.
Ang assistant choreographer amo si Totchie Vergara.
Si Vergara ang alumnus sang nasambit nga eskwelahan kag antes nangin assistant choreographer, nangin dance master siya sang 2015 tubtob 2017.
Kahapon, Enero 2, ginpabalhag sa Jaro Police Station si Vergara bangud sa pahayag nanday Alyas Toto, Alyas Nonoy, kag Alyas Tata, mga miyembro sang Tribu Salugnon, nga naakig si Vergara sa ila bangud nagsaka sila sa ikaduha nga panalgan sang isa ka building sa eskwelahan kag bangud sini, isa-isa nga ginpulpog sang microphone ang ila nga ulo.
Pahayag ni Alyas Toto, nakibot lang sila sa ginhimo sang trainer bangud wala man sila sang ginhimo nga sala kag iya man gin-alegar nga indi ini ang una nga bes nga nanakit si Vergara sa mga miyembro sang tribu.
Sa interview sang Bombo Radyo kay Dr. Dinupol, iya ginpahayag nga ipatawag niya subong nga adlaw, Enero 3, ang mga natungdan — si Totchie Vergara, anom ka estudyante nga nalakip sa ginapahayag pagpanakit (tatlo ka propsmen kag tatlo ka drummers) kag ila mga ginikanan.
Suno kay Dr. Dinupol, magapatigayon sang imbestigasyon ang eskwelahan ilabi na bangud ini ang una nga bes nga may report batok kay Vergara kaangot sa pagpanakit.
Dugang pa sang natungdan, una na siya nga naghatag sang mandu sa mga kabataan nga indi magsaka sa apat ka panalgan nga building sang eswkelahan bangud sa risgo sang pagkahulog.
“Pressured gani ang principal,” pahayag ni Dr. Dinupol kaangot sa kun bala, ‘pressured’ lang si Vegara kun ngaa nahimo niya ang amo nga alegasyon.
Nahibaluan nga yara sa ika-apat nga pwesto ang Tribu Salugnon sang nagpasakop ini sa Dinagyang 2019.
Natalana naman sa Enero 10 ang opening salvo sang amo nga kahiwatan subong nga tuig.
