ILOILO CITY – Patay ang isa ka cashier sang convenience store matapos nga natiruhan sang job hire sa Mayor’s Office sa Barangay Bagacay West, Maasin, Iloilo.
Ang biktima amo si Angelo Miro, 23, sang, Barangay Bagacay West sa amo nga banwa.
Samtang, ang suspek amo si June Masculino, 38, job hire sa opisina sang alkalde sang amo nga banwa.
Sa interview sang Bombo Radyo kay Pol. Lt. Jayson Mausig, hepe sang Maasin PNP, iya ginpahayag nga may yara sang komosyon sa ginpatigayon nga disco kadungan sang kapyestahan sa lugar.
Bangud sang komosyon, nagpalupok ang suspek bilang warning shot.
Natabuan nga nagsaka ang biktima sa kudal sang gym kag na-igo sa ulo nga rason sang iya gilayon nga kamatayon.
Preso na sa Maasin PNP ang suspek.
Yara naman sa kustodiya sang kapulisan ang caliber 45 nga gingamit sang suspek.
