Ginbasura na sang Korte Suprema sang Bangladesh ang quota sa government jobs nga amo ang nangin rason sang lapnagon kag maduguon nga protesta sa amo nga pungsod sa South Asia nga nag-resulta sa kamatayon sang 114 ka mga tawo.
Sa desisyon sang Appellate Division sang Supreme Court, nakasaad nga gina-dismiss sini ang nauna nga mandu sang lower court kag ginmandu na nga wala dapat sang quota nga ibutang sa 93% sang mga trabaho sa gobyerno.
Ginsiling man ni Bangladesh Attorney General AM Amin Uddin nga nagpanindugan ang mga nag-protesta nga mga estudyante nga indi sila ang nagpasimuno kag nagpasakop sa mga kalakasan nga amo ang nagtuga sang kamatayon sang iban kadungan sang pagprotesta.
Kaangot diri, gin-promisa sang gobyerno nga imbestigaran sang otoridad kun may iban pa gid nga pwersa nga nag-resulta sa pagpanglakaak sa death toll kag nagresulta man sa pagkasamad sa 1,500 ka mga tawo pati na sa kapital nga Dhaka.
Nahibaluan nga sa protesta, ang gina-demand sang mga tawo amo nga untaton na ang quota system nga nagatigana sang 30% sang government jobs sa mga pamilya sang mga beterano nga nangin kabahin sang war of independence sang Bangladesh sang 1971.
Ginapanindugan sang protesters nga indi patas kag “discriminatory” ang amo nga tikang kag ang sarang lamang makabenepisyo diri amo ang supporters ni Prime Minister Sheikh Hasina kag gusto nila ini islan sang merit-based system.
Nadabukan pa ang tensyon bangud nagpahayag ang prime minister nga ‘razakars’ ang protesters ukon katumbas sang derogatory nga Bangla word para sa tinaga nga “traidor.”
Antes ang desisyon sang Supreme Court, nagdangat sa punto nga temporaryo nga ginpangsirado ang mga eskwelahan sa pungsod sang nagligad nga semana, ginpatuman ang nationwide curfew, gin-ban ang mga pagtilipon, kag naggamit pa ang police and security officials sang tear gas sa tunga sang lapnagon nga kinagamo.
Mangin ang US state department ang nagpasaka sang ila travel advisory sa Bangladesh sa Level IV kag ginhaylo ang American citizens nga likawan anay ang pagbyahe sa amo nga pungsod.
