Nagpakig-angot na ang Commission on Elections-Mina, Iloilo sa Task Force Katotohanan, Katapatan at Katarungan (KKK) sang poll body sa possble tikang batuk sa job hire sang Local Government Unit sang banwa nga assigned sa ila opisina bangud sa pagpost sang video online kadungan sang Byernes Santo, Abril 18, 2025.
Sa video makit-an si Mina Mayor Lydia Grabato kag officer sang Comelec sa diin ginakwestyun sang alkalde ang operation sang Oplan Baklas nga natabo sang Abril 4.
Sa statement nga ginpaguwa sang Comelec-Mina, nasaad nga ang video nakuha sang Abril 4 pagkatapos lang sang official operation sang Task Force Baklas sa diin ang mga ginadumilian nga campaign materials sang local kag national candidates ang ginpangkakas kag ginkumpiska.
Nagpadulong sa Comelec-Mina si Mayor Grabato on behalf sang iya political party kag ginkwestyun ang ginpatigayon nga baklas operation sa diin iya ginpabutyag ang iya disapproval kag criticism, ilabi na sa designation sang common poster areas.
Suno sa Comelec-Mina, bilang public servants, bukas sila sa tanan nga sahi sang reklamo kag kritisismo halin sa stakeholders.
Nakahatag naman sang proactive measures ang opisina agud nga ma-address ang reklamo sang alkalde may kaangtanan sa designation sang common poster areas kag ginsabat naman sang Comelec-Mina ang mga palamangkutanon kag concerns halin sa supporters sang iban nga local candidates tuhoy sa baklas operation sang Abril 4 — antes pa man ini gin-post ang video clip online.
Dugang pa sang Comelec-Mina, ang video clip nga gin-upload ang ginakabig nga sahi sang digital information campaign ilabi na nga gin-post pa gid ini sang Good Friday sa diin ginadumilian ang pagpangampanya.
Posible pahayag sang opisina nga ginlapas sang video uploader ang Comelec Resolution No. 11064 ukon “Guidelines On The Use Of Social Media, Artificial Intelligence, And Internet Technology, For Digital Election Campaign, And The Prohibition And Punishment Of Its Misuse For Disinformation, And Misinformation, In Connection With The 2025 National And Local Elections And The Barmm Parliamentary Elections.”
Ginkumpirma man sang Comelec-Mina nga job hire sang LGU nga assigned sa ila opisina ang nag-video kag ginpost nga wala man lang nakahibalo ang talatapan.
Samtang ginapabilin sang Comelec-Mina nga wala sang employer-employee relationship sa tunga sang commission kag sa staff, ang opisina ang naghimo na sang precautionary measure kag padayon nga gina-imbestigaran ang insidente.
