ILOILO CITY- Arestado ang isa ka jobhire sang Iloilo City Hall kag duha pa ka kaupdanan sini sa raid sa drug den sa Brgy. Baldoza, La Paz, Iloilo City.
Ang mga nadakpan amo sanday Carlos Parreño, alyas Noknok, 44, assigned sa pay parking sang syudad kag amo ang maintainer sang drug den; Ronel Loraña, alias Nonoy, 33; kag, Joefrey Oñadia, 38, isa ka delivery boy.
Na-rescue naman ang 17- anyos nga estudyante na anak ni Parreño.
Sa interview sang Bombo Radyo kay Atty. Bomrad Soc Abonado, spokesperson sang Philippine Drug Enforcement Agency Region 6, iya ginpahayag nga madugay na nga gina-monitor si Parreño.
Narekober sa lugar ang transparent plastic sachets nga may unod nga shabu kag may street value nga nagalab-ot sa masobra P100,000.
Magapangatubang sa kaso nga paglapas sa RA 9165 ukon Comprehensive Dangerous Drug Act of 2002 ang tatlo ka durugista nga yara sa kustodiya subong sang La Paz Police Station para sa nagakaigo nga disposisyon.
