Nagpatigayon sang joint inspection kag walk through sa Iloilo Central Market ang Local Economic Enterprise Office, City Engineering office kaupod ang SM prime holdings inc. subong nga adlaw, Enero 5.
Ini matapos nga naguba ang mga tiles kag nagbulwak ang tubig halin sa drainage line kasunod sang mamunog nga ulan sang nagligad nga Byernes sang hapon.
Sa interview sang Bombo Radyo kay Maricel Mabaquiao, Local Economic Enterprise Office Head, iya ginpahayag nga mas maayo nga aga pa nakit-an ang leakage sa nasambit nga merkado agud nga gilayon na ini nga masolusyunan.
Sa mga produkto, may ara sang estimated damages nga naga balor masobra sa P140, 000 apang wala pa ini ma-finalize sang LEEO bangud nga pagabatunon palang nila ang report halin sa market in-charge kun pila gid ang mga na-damage ukon nabasa nga mga produkto.
Nagpasalig man si Mabaquiao nga 100% sa mga nagkalaguba nga produkto ang pagabayaran sang SM Prime.
