POTOTAN, ILOILO – Magapatigayon sang joint inspection ang mga katapo sang Committee on Public Order and Safety sa Sanguniang Panlalawigan, mga barangay official kag tiglawas sang National Telecommunications Commission sa Iloilo District Jail sa Brgy. Nanga, Pototan, Iloilo.
Ini ang ginkasugtan sa joint committee hearing sang Committee on Public Order and Safety kag Committee on Transportation, Communication and Public Utilities tuhoy sa ginareklamo nga signal jamming device sang Iloilo District Jail nga naga-apekto sa mga pumuluyo sang nasambit nga lugar.
Sa interview sang Bombo Radyo kay Iloilo 2nd District Board Member June Mondejar, chairman sang Committee on Public Order and Safety, iya ginpahayag nga natalana sa Nobyembre 19 ang joint inspection agud hibaluon kun ginsunod ang specification sa pag-install sang signal jamming device.
Suno kay Mondejar, nakadepende sa mangin resulta sang joint inspection ang mangin lihok sang Sanguniang Panlalawigan agud nga masolbar ang ginareklamo sang pumuluyo.
Ginpahayag ni Mondejar nga dapat indi maapektuhan sang signal jamming ang mga pumuluyo sang Barangay Nanga kag iban pa nga barangay sa banwa sang Pototan.
Nahibalu-an nga katuyu-an sang pag-install sang signal jamming device sa Iloilo District Jail amo nga matapna ang illegal drug transaction sa sulod sang jail facility apang apektado ang signal sang komunikasyon sang mga pumuluyo sa nasambit nga lugar.
