ILOILO CITY – Ginpasa na sang Philippine Coast Guard (PCG) kag sang Maritime Industry Authority (MARINA) ang resulta sang joint investigation sa Recto Bank sa West Philippine Sea.
Ini ang kasunod sang pagbunggo sang Chinese fishing vessel sa sakayan-pandagat sang 22 ka mga manugpangisda nga Filipino.
Sa interview sang Bombo Radyo kay Admiral Elson Hermogino, commandant sang Philippine Coast Guard, iya ginpahayag nga ginsentrohan sang nasambit nga joint maritime investigation amo nga mahibalu-an kun bala may yara sang kapaltahan ang magtimbang nga bahin rason nga natabo ang aksidente.
Ginpahayag ni Hermogino nga may yara sang international regulation nga ginasunod agud nga malikawan ang maritime accident.
Sa subong suno kay Hermogino, ginahulat na lang nila nga ang presidente nga amo ang magapaguwa sang official result.
Samtang, may yara na sang deployment ang PCG sa West Philippine Sea kasunod sang natabo sa Recto Bank.
Sa pagkamatuod suno kay Hermogino, mas pasangkaron sang PCG ang pagpatrolya sa Exclusive Economic Zone sang Pilipinas.
Sa subong, nagahulat na lang ang PCG sang mandu gikan sa presidente tuhoy sa ila deployment.
Nahibalu-an nga isa si Hermogino sa nangin dinapit nga bisita sa ika-36 nga founding anniversary sang PCG Western Visayas-District nga ginpatigayon sa syudad sang Iloilo.
