Indi seryoso ang Duterte Administration sa pagtutok sa COVID-19 pandemic sa Pilipinas.
Ini ang reaksyon ni Opposition Senator Francis ‘Kiko’ Pangilinan sa lahog ni Presidente Rodrigo Duterte nga mahimo magamit ang gasolina bilang disinfectant agud malikawan ang paglapta sang COVID-19.
Sa interview sang Bombo Radyo kay Pangilinan, iya ginpahayag nga ang amo nga lahog sa publiko ang nagapakita lang nga wala ginatutukan sang gobyerno ang problema sa virus sa Pilipinas.
Kadungan sini, ginpakamalaot sang senador ang natabo nga pagpasar sang Anti-Terrorism Act of 2020 kag pagpahanugot sa operasyon sang Philippine Offshore Gaming Operators (POGO) apisar wala sang trabaho ang kalabanan nga mga Pinoy.
Suno pa sa senador, apisar ang Pilipinas ang may pinakamalawig nga lockdown sa bug-os nga kalibutan, padayon sa gihapon nga nagataas ang numero sang COVID-19 cases.
“SA IBAN PA NGA IREGULARIDAD”
Nagpasalig man si Sen. Pangilinan nga padayon nila nga busision ang tanan nga iregularidad nga nagakatabo sa tunga sang COVID-19 pandemic.
Ini ang kasunod sang iya pagbuyagyag nga nagnubo sang 26% ang presyo sang imported test kits matapos gin-anunsyar sang Department of Health nga naaprubahan na ang commercial release sang locally-made nga test kits nga ginhimo sang University of the Philippines-National Institutes of Health (UP-NIH).
May kaangtanan sa isyu sang mga test kits nga wala nagasanto sa test machines sa mga ospital, ginpahayag ni Pangilinan nga padayon nila ini nga iga-monitor agud mapadasig ang testing capacity sa Pilipinas.
