Pormal nga ginpasakaan sang criminal complaint sa Office of the City Prosecutor ang Chief of Staff ni Mayor Raisa Treñas nga si Jonas Bellosillo.
Ini may kaangtanan sa ginapahayag nga pagpanakit sini gamit ang uluyatan sang silhig sa mga pamatan-on sa Barangay Ma. Christina, Jaro, Iloilo City sang Mayo 17.
Sa interview sang Bombo Radyo kay Atty. Danielle Naciongayo-Robles, legal counsel ni Alyas Julia, iya ginpahayag nga nagpadulong na subong nga adlaw, Hulyo 9 si alyas Julia sa Office of the City Prosecutor agud mag-file sang kaso nga slight physical injury kag unjust vexation batok kay Bellosillo.
Suno kay Robles, magahulat na lang sila sang resolusyon sang fiscal batok sa ila ginpasaka nga reklamo.
Pahayag pa sini nga may ara man sang opportunidad si Belosillo sa pagsabat sa ila nga reklamo bangud pagahatagan man ini sang opportunidad sang fiscal.
Ginklaro man sang abogado sang complainant nga indi gid ini magpa-settle rason nga naglab ot na sa pagpasaka sang kaso batok kay Bellosillo.
Sa madumduman nga nagluntad ang ini nga insidente pasado alas-3 sang kaagahon sang Mayo 17, kun sa diin hinali na lang nga ginsinggitan ni Bellosillo ang mga pamatan-on antes ginpanghampak ang mga ini gamit ang silhig.
Naka-agom man si Alyas Julia sang mga lagob sa nagkalain-lain nga parte sang lawas sini kag ginhilanat man matapos ang insidente.
