JORDAN, GUIMARAS – Ginpakigbahin ni Jordan, Guimaras Mayor Ruben Corpuz ang sekreto sang banwa sa pag-angkon sang high compliance nga rating sa road clearing operations.
Sa interview sang Bombo Radyo kay Corpuz, iya ginpahayag nga sang iya nabaton ang letter gikan sa Department of Interior and Local Government, gilayon niya nga ginsapol ang mga opisyal sang Jordan kag naghimo sang executive order agud mapatuman ang pagpanghawan sa mga dalanon.
Suno kay Corpuz, tagsa ka adla, nagalibot ang task force sang banwa agud nga kuhaon ang mga nagasablag sa dalan.
Lakip sa mga ginpangguba ang mga portion sang eskwelahan kag plaza nga nagalaksam sang dalan, barangay hall kag mga waiting shed.
Mas gintutokan sang task force ang Alibjon kag Alaguisoc bangud madamo sang mga obstruction nga kinahanglan kuhaon.
Ginpahayag sang alkalde nga nagahugpong ang mga pumuluyo kag opisyal rason nga natigayon nga makuha sang banwa ang high compliance rating.
Nahibaluan nga isa lang ang banwa sang Jordan sa probinsya sang Guimaras nga nakakuha sang high compliance nga rating samtang ang Buenavista, Nueva Valencia, San Lorenzo kag Sibunag ang nakaangkon sang medium compliance rating.
