Ginpasalig sang Jordan Local Government Unit nga preparado na ini sa pag-abot sang mga dumuluong kag mga tumuluo para sa ika-48 ka tuig sang Pagtaltal sa Balaan Bukid sa probinsya sang Guimaras.
Sa interview sang Bombo Radyo kay Jordan Mayor John Edward Gando, iya ginpahayag nga sa Abril 3 patigayunon ang bantog nga Lenten tradition nga nagapakita sang pag-antos ni Hesus kag paglansang sa Iya sa Krus.
Preparado na ang security plan sang kapulisan amo man ang paghatag sang medical services pananglitan may maglain ang pamatyag.
Maga-umpisa ini sa atubang sang munisipyo 11:00 sa aga kag magatakop alas tres sa hapon sa Balaan Bukid Shrine sa Barangay Balcon Melliza.
Sa kinaandan sa nagligad nga mga tuig, naga-umpisa ang prusisyon sa “Smallest Plaza” sa Barangay Poblacion apang subong, maga-umpisa ini sa atubang sang munisipyo kag mas malapit sang gamay ang ruta. May gamay man nga kinalain sa produksyon apang amo man gihapon ang mga eksena nga iga-reenact kadungan sang presentasyon.
Sang 2025, nakadangat sa 24,000 ka mga indibidwal ang nagbisita sa Balaan Bukid.
Bantog sa bilog nga Western Visayas ang “Pagtaltal sa Balaan Bukid” nga nagsugod sadtong 1975.
Magluwas nga isa ini ka religious performance, nagaserbe man ang Pagtaltal bilang sahi sang penitensya para sa mga tumuluo nga nagakadto agud nga magpabutyag sang ila nga paghinulsol sang ila mga sala.#
