Ginlockdown ang Jordan Municipal Police Station matapos nagpositibo sa COVID-19 ang isa ka police personnel.
Sa interview sang Bombo Radyo kay Police Major Kenneth Bermejo, hepe sang nasambit nga estasyon, iya ginpahayag nga 11 sila tanan ka police personnel ang ginpaidalom na sa istrikto nga quarantine samtang ginahulat ang resulta sang ila swab test matapos natumod nga close contact sang isa ka kaupdanan nga pulis nga nagpositibo sa virus.
Suno kay Bermejo, ginapahayag nga nalatnan sang iya asawa nga una na nagpositibo sa COVID-19 ang ila isa ka police personnel.
Sa subong, istrikto nga ginamonitor ang kondisyon sang amo nga pulis sa diin natalana naman nga ipaidalom sa total disinfection ang Jordan Municipal Police Station.
Limitado naman sa subong ang mga transaksyon sa nasambit nga estasyon.
