ILOILO CITY — Ginalantaw sang isa ka transport cooperative nga makatuga sang huol ang ginapatuman nga pagpasulod sa Iloilo City sang 40% nga consolidated units halin sa first town municipalities sang Iloilo Province.
Sa interview sang Bombo Radyo kay Pefecto Yap, consultant sang Joroshley Transport Service Inc., iya ginpahayag nga ang pagpasulod sang 40% nga mga units sa syudad ang posible makatuga sang pagpugok sang trapiko sa Iloilo City.
Suno kay Yap, may yara sang 1,782 ka mga traditional kag modernized jeepneys ang nagataris sa syudad kag kun piliton nga pasudlon ang 40% sang kabug-usan sang consolidated units halin sa probinsya, makahatag gid ini sang traffic congestion.
Ginpahayag man ni Yap nga sa 25 ka mga ruta sa syudad, may yara sang pito tubtob walo ang naga-eksperyensya sang pagpugok sang trapiko, sa diin, posible pagid madugangan kun maga-arangka na ang pagbyahe sang mga units halin sa probinsya.
Naghingyo man ini sa City Government nga nga 25% lang kuntani ang pasudlon agud indi mangin crowded kag congested ang dalan sa Iloilo City ilabi na nga limitado kag makitid ang iban nga alagyan.
