Gin-nominate sang Federation of Filipino Chinese Chambers of Commerce & Industry, Inc. (FFCCCII) ang Ilonggo singer-songwriter nga si Jose Mari Chan bilang isa ka National Artist.
Suno sa federation chairman kag spokesperson nga si Wilson Lee Flores, naapelar na nila anay kay former President Rodrigo Duterte nga ihatag kay Chan ang amo nga titulo, kag subong, tinguhaan nila nga i-request ini kay Pres. Ferdinand Marcos Jr.
Nahibaluan nga mangin sa Kamara, ang miyembro sang House Committee on Creative Industries nga si Surigao del Norte 2nd district Rep. Robert Ace Barbers ang nagsiling man nga tion na nga ihatag kay Chan ang titulo.
Pinakakilala ang 78-anyos nga singer-songwriter sa iya immortal hit nga “Christmas In Our Hearts”, ginakabig nga isa sa most renowned balladeers kag composers, kag ginatawag sang iban nga “King of Philippine Christmas Carols”.
Ang Order of National Artists (Order ng Pambansang Alagad ng Sining) amo ang highest national recognition nga ginahatag sa Filipino individuals nga may daku nga kontribusyon sa development sang Philippine arts sa patag sang music, dance, theater, visual arts, literature, film, broadcast arts, kag architecture and allied arts.
Ginahatag ini sang National Commission for Culture and the Arts (NCCA) kag Cultural Center of the Philippines (CCP) kag gina-confer sang President of the Philippines kun may rekomendasyon halin sa duha ka nasambit nga institusyon.
