Nagpabutyag sang pagkadismaya ang Ilonggo singer-songwriter nga si Jose Mari Chan bangud wala na ini makabaton sang royalty earnings halin sa mga kanta nga iya ginsulat.
Sa isa ka media conference para sa iya palaabuton nga concert nga “Afterglow: Seasons of the Heart,” ginpamangkot ang OPM icon kon pila ang na-income sini halin sa mga classic OPM songs sini.
Suno sa singer-songwriter wala ini sang may ginakuha nga kita halin sa mga recording company.
Pahayag pa sini, labaw sa iya kaugalingon nga kinahanglanon, mas nagakabalaka ini para sa mga batan-on nga singer-songwriters sa Pilipinas.
Apisar nadismaya ini, nagapadayon naman ini nga nagapangita sang kalipayan sa pagsulat sang mga jingle para sa mga brand, sa iya trabaho sa private companies, kag sa pagpakigbahin sang iya talento sa entablado upod sa mga bag-o nga mga singers kag artista.
Magapatigayon ini sang iya concert nga “Afterglow: Seasons of the Heart” sa Hulyo 11 sa PICC Plenary Hall.
