Ginsirado na ni Pope Leo XIV ang katapusan nga Holy Door sa St. Peter’s Basilica sa Roma nga amo ang opisyal nga nagatakop sang 2025 Jubilee Year.
Nagsentro ang seremonya sa pagsirado sang balaan nga ganhaan kag ginsundan sang misa para sa Solemnity of the Epiphany of the Lord nga gintambungan sang mga tumuluo kag dignitaries lakip na si Italian President Sergio Mattarella.
Matandaan nga nagsugod ang Holy Year sang Disyembre 2024 sa pagpanguna ni Pope Francis sang ginbuksan man sini ang Holy Door.
Ang bilog nga tuig ginkabig nga selebrasyon kag tion sang repleksyon kag penitensya para sa masobra 1.4-billion ka mga Katoliko sa bilog nga kalibutan. Masobra man sa 33 milyones nga mga tumuluo halin sa 185 ka mga pungsod ang nagbisita sa Roma sa sini nga espesyal nga tuig.
Sa kada Jubilee Year nga gina-organisar sang Simbahan sa kada 25 ka tuig, ang kada tumuluo nga nagaagi sa holy doors ang nagabenepisyo sa “plenary indulgence” ukon ang sahi sang pagpatawad sa ila nga mga sala.
Pinasahi man ini nga Jubilee bangud si Pope Francis ang nag-inagura, apang bangud sa iya kamatayon, si Pope Leo ang nagtapos. Katapusan nga natabo ini nga senaryo sa Catholic Church sang 1700.
