Ginpanindugan sang korte sa Muntinlupa City ang desisyon sini nga i-acquit si Mamamayang Liberal Representative-elect Leila de Lima kag iya anay driver nga si Ronnie Dayan may kaangtanan sa kaso nga conspiracy to commit illegal drug trading.
Ini nga desisyon sang Regional Trial Court (RTC) ang ginpaguwa matapos ginbalik sang Court of Appeals (CA) Eighth Division sang Abril ang May 12, 2023 decision sang lower court.
Suno sa appellate court, gin-remand ang kaso bangud napaslawan ini nga maplastar ang “specific proven facts” amo man ang mga layi nga ginbasehan sang hukom agud i-acquit ang mga akusado.
Sabat naman ni Muntinlupa RTC Branch 204 Judge Abraham Joseph Alcantara, ang pagbawi ni former Bureau of Corrections chief Rafael Ragos sa iya testimoniya ang bastante na nga basehan para sa RTC nga sundon ang “constitutionally guaranteed presumption of innocence.”
Suno sa judge, ang pagbawi ni Ragos sang iya statement ang naghatag sang “reasonable doubt” rason sang acquittal kanday De Lima kag Dayan.
Matandaan nga una gin-claim ni Ragos nga siya kag ang iya aide ang nagdul-ong sang P10 million sa balay ni anay justice secretary De Lima sa Parañaque City sang Nobyembre kag Disyembre 2012. Gin-alegar sini nga ang kuwarta naghalin sa illegal drug trade sa sulod sang New Bilibid Prison.
Apang sang 2022, ginbawi sini ang iya testimoniya samtang nga naka-detain na si de Lima.
Matandaan nga malapit pito ka tuig nga na-detain si de Lima antes ini napaguwa paagi sa pyansa sang November 2023. Gin-dismiss ang ulihi sa iya tatlo ka drug-related cases sang Hunyo 2024.
Sang 2025 elections, daog si De Lima bilang representative sang Mamamayang Liberal, kag sa iya pagbalik sa 20th Congress, isa siya sa kumpirmado nga magapungko sa prosecution team sang Kamara para sa impeachment trial ni Vice President Sara Duterte.
