Ginmultahan ang isa ka judge sa Sweden bangud sa ginapahayag tuyo nga pagpangawat sang Christmas ham kag meatballs.
Suno sa prosecutor sa amo nga kaso, nadakpan sang staff sang grocery store sa central Stockholm ang 67-anyos nga Supreme Court justice isa ka semana antes ang Paskuwa.
Suno kay chief public prosecutor Per Nichols, ginpabayad ang amo nga judge bangud sa krimen nga petty theft ukon shoplifting.
Sang Pebrero, nag-resign na ini sa iya nga posisyon sang naglapta ang reports nga ginaimbestigaran siya.
Duha ka dekada man ini nga nagatrabaho bilang judge.
Sandig sa reports, antes ang Christmas, samtang yara sa grocery store, gintago sini ang Christmas ham, meatballs, sausages kag cheese sa bag paagi sa pagtabon sang isa pa ka bag.
Gin-ako sini ang facts sa amo nga kaso apang ginpanginwala ang intensyon nga magpangawat sang groceries.
Nagdangat sa 50,000 Swedish kronor ukon P276,400 ang gindagdag nga multa. ##
