Nagbalik na sa paghampang ang San Miguel Beermen big man nga si June Mar Fajardo matapos ang gamay nga pahuway kasunod sang injury nga naangkon sa finals sang PBA Commissioner’s Cup sang nagligad nga bulan.
Kahapon, naghampang ang nasambit nga 7-time PBA Most Valuable Player sang halos 25 minutos para sa iya team kun sa diin nakatipon ini sang 15 puntos kag nakabulig sa San Miguel nga lutuson ang Rain or Shine, 109-97, sa ila nga PBA Philippine Cup debut.
Malipayon si Fajardo nga na-kondisyon na ang liwat ang lawas sini kag makaamot na sa pagpaulan sang puntos.
Ginabase man ang playing time sini pati sa mangin performance sang iya substitutes kaangay kay Mo Tautuaa.
Matandaan nga nalakip si Fajardo sa 12 ka players nga core team ni Coach Tim Cone para sa Gilas Pilipinas apang pareho sila ni AJ Edu nga wala nakahampang sa first window sang FIBA Asia Cup Qualifiers batok sa Hong Kong kag Chinese Taipei bangud sa ila nga mga naangkon nga injuries.
