ILOILO CITY- Ginrelieve sa ila pwesto ang mga junior commanders sang duha ka mga pulis nga nadakpan nga nagpalusot sang ilimnon, sa checkpoint sa banwa sang Guimbal, kag banwa sang Lemery.
Ang mga ginpangrelieve nga junior commanders ang ginalakipan nanday, Capt Victor Bacinilio, supervisor sang Regional Personnel Holding and Accounting Unit nga assign si PSSG Jose Digcabo-on Jr. nga nadakpan sa banwa sang Guimbal kag si Pol Lt George Caño, platoon leader, ni Police Staff Sergeant Joe Marc Ebon nga assign sa 2nd Mobile Platoon, sang 2nd Iloilo Provincial Mobile force Company nga nabase sa Cabaguhan Batad Iloilo.
Sa interview sang Bombo Radyo kay Pol. Lt. Col Gilbert Gorero,Acting Regional Public Information Officer sang Police Regional Office 6, iya ginpahayag nga ang nasambit nga lihok ang yara mismo sa idalom sang one strike police memorandum ni Police Regional Office 6 Director Police Brigadier General Rene Pamuspusan.
Suno kay Gorero, sa idalom sang one strike policy magapanabat ang mga direct supervisors sang tagsa ka mga pulis nga madakpan nga nagalapas sa liquor ban, bangud sa ila kakulangan nga maghatag sang pahanumdum.
Pahayag pa ni Gorero, kuntani mangin leksyon na ang nasambit nga hitabo sa mga unit commanders, nga bantayan kag ipahanumdum sa ila personnels ang one stike policy sang Regional Director.
Sa subong, si PCAPT. Bacinillo ang naka-assign sa Regional Headquarters Support Unit, kag si Pol. Lt. Caño ang naka-assign sa Regional Personnel Holding and Accounting Unit.
Ang mga pulis naman nga nagkaladakpan, ang magapangatubang sang kaso administratibo, kag ginhatagan sang fatigue duty.
Nahibaluan nga nagdangat na sa lima ka mga pulis ang nagkaladakpan sa rehiyon, nga plano kuntani magpalusot sang kinarton sang makahulubog nga ilimnon sa checkpoint pasulod sa probinsya sang Iloilo.
