Ginalauman nga makabalik na sa Pilipinas kag makahanas liwat subong nga semana ang basketball hero sang pungsod nga si Justin Brownlee matapos ini ginhatagan na sang clearance sang FIBA nga makahampang para sa Gilas Pilipinas sa 2025 Asia Cup qualifiers window.
Si Brownlee ang magapungko nga naturalized player sang Gilas sa first window sandig sa ginpili ni Coach Tim Cone sang nagligad nga semana.
Updan sini sa national team sanday Chris Newsome, June Mar Fajardo, Dwight Ramos, Kevin Quiambao, Kai Sotto, Carl Tamayo, AJ Edu, Calvin Oftana, Scottie Thompson, CJ Perez kag Jamie Malonzo.
Sa Pebrero 22, magahampang ang Gilas batok sa Hong Kong samtang sa Pebrero 25, magabalik ang nationals sa home court sa PhilSports Arena kag makasambuwa ang Chinese Taipei.
Madumduman nga sang Oktubre 2023, si Brownlee ang nagtib-ong sa Gilas agud nga makuha ang kampyonato sa Asian Games sa China —korona nga masobra anum ka dekada nga ginhulat sang mga Pilipino.
Wala nagdugay ang selebrasyon sang Gilas bangud gilayon man nga gin-anunsyo sang International Testing Agency nga nagpositibo si Brownlee sa ginadumilian nga substance nga Carboxy-THC.
Sandig sa anunsyo sang Samahang Basketbol ng Pilipinas (SBP) kahapon, Pebrero 3, gindagdagan si Brownlee sang “Notice of Charge” kun sa diin tatlo ka bulan ini nga suspendido sa paghampang apang bangud nag-boluntaryo na ini nga indi maghampang halin pa sang nagguwa ang violation sang Nobyembre 9, 2023, magalawig lamang tubtub sa Pebrero 8 ang iya nga suspensyon.
Ginbuyagyag man ni SBP executive director Erika Dy nga si Brownlee mismo ang may daku nga kahimuan sa pagpanubo sa iya penalty bangud apisar nga siya ang resident import sang Barangay Ginebra, nag-desisyon ini nga indi maghampang para sa Gin Kings sa PBA Commissioner’s Cup apisar pa nga pwede pa kuntani siya makahampang sa conference.
“He also voluntarily suspended himself. It’s more of Justin agreeing na without a sentence to step back first. It was a sacrifice on his part,” suno kay Dy.
