Ginplastar sang anay national intelligence officer sang Communist Party of the Philippines–New People’s Army (CPP-NPA) ang rason sa pagsungka sang self-proclaimed son of God nga si Pastor Apollo Quiboloy sa Armed Forces of the Philippines.
Sa interview sang Bombo Radyo kay Jeffrey “Ka Eric” Celiz, iya ginpahayag nga wala sang salig si Quiboloy sa Philippine National Police (PNP).
Suno kay Celiz, kilala si Quiboloy nga malapit sa Armed Forces of the Philippines (AFP) rason nga sa militar ini nagsungka kag indi sa mga pulis.
Ginpahayag sini nga sa isa ka lugar sa Mindanao lang nagapanago si Quiboloy kag indi sa underground bunker sang Kingdom of Jesus Christ (KOJC) religious compound sa Davao City.
Nanindugan man si Celiz nga nagsungka si Quiboloy kag wala gin-aresto.
Ini suno sa natungdan ang baliskad sa pahayag ni Department of Interior and Local Government. Secretary Benhur Abalos, Jr. nga gin-aresto sang mga otoridad si Quiboloy kag wala nagsungka.
Ginpili naman ni Quiboloy suno kay Celiz nga magsungka bangud indi na sini maagwantahan ang ginahimo nga pagpabudlay sa iya mga myembro sa kamot sang mga kapulisan.
