Maga-file sang complaint si presidential candidate Leodegario “Ka Leody” de Guzman batok kay Mayor Pablo Lorenzo III sang Quezon sa Bukidnon bangud sang shooting incident nga nagluntad sa plantasyon sa amo nga banwa kun sa diin nagpatigayon siya sang iya nga campaign sortie.
Suno kay De Guzman, nalista si Lorenzo bilang general manager sang kumpaniya nga nagapanag-iya sang plantasyon kun sa diin natabo ang pagpinalupok.
Kun basehan ang statement sang Northern Mindanao Police Regional Office (PRO 10), 12:20 sang Martes sang udto natabo ang shooting incident.
Nagbisita sanday De Guzman kag senatorial candidates Roy Cabonegro kag David D’Angelo sa area — lugar nga gina-claim sang Manobo-Pulangihon tribe bilang ila nga ancestral domain.
Hilway sa katalagman si De Guzman, apang may ginapahayag lima ka tawo nga napilasan. Ginsaysay man ni De Guzman nga sa iya pagpati, indi mga guards ang nagpangluthang sang amo nga adlaw kundi mismo mga personnel sang company.
Gin-alegar man sang presidential candidate nga may mga soldado man sa highway apang wala man sang ginhimo.
Malapit lang ang ila distansya suno kay De Guzman kag pat-od gid nga nabatian ang mga lupok apang wala sang bisan isa nga nag-responde.
Duda man ini nga may kasugtanan sa tunga sang National Commission on Indigenous Peoples (NCIP) kag sa Armed Forces of the Philippines (AFP).
Una diri, nagpahayag na ang Philippine National Police (PNP) nga pre-mature pa agud kabigon nga election-related ang amo nga insidente. ##
