Nag-apelar sa publiko ang suod nga abyan ni Senator Manny Pacquiao nga untaton na ang paghaboy sang pagpakamalaot sa boxing champion kag hatagan ini sang suporta para sa nagahilapit na niya nga sambuwa sa Agosto 21 sa Estados Unidos.
Sa exclusive interview kay Samahang Weightlifting ng Pilipinas (SWP) president Monico Puentevella nga amo man ang former Representative kag Mayor sang Bacolod City, iya ginpahayag nga dugo kag balhas ang ginasakripisyo ni Pacquiao para makuha ang kadalag-an sang pungsod sa patag sang boxing.
”Ginpahayag ko ang mensahe tubtob kay Presidente Digong nga kun mahimo, tapuson ta bala anay ang away… kay ang gabato ya Filipino, indi mana ya iban. Ti gapamalhas ang tawo, nagapanginmatay para sa bandila sang Pilipinas, sagi niyo man ya yaguta kag sagi niyo man ya insulto…Siling ko, kun mahimo, Mr. President, hasta ang mga trolls mo da, kun mahimo untata niyo nana…Didto sa amerika idol siya sang tanan… siling nila, popular pa siya kay Lebron James. Ti sagi tadi ya ka yaguta tungod lang sa politika… ti nano bi na,”
Suno kay Puentevella, kilala niya si Pacquiao kag hugot ang pagfocus sini kun may yara sang training para sa natalana nga sambuwa.
Pahayag ni Puentevella, una na niya ginhingyo ang government officials ilabi na si Presidente Rodrigo Duterte nga untaton anay ang pagpang-atake kay Pacquiao bangud ginpat-od man sang senador nga sa tion nga matapos ang iya sambuwa batok kay Errol Spence Jr. sa Estados Unidos, atubangon niya ang tanan nga isyu sa Pilipinas angot sa politika.
Dugang pa niya, nagakadapat nga ipaiway anay sang pungsod ang politika kag suportahan ang Pinoy Pride sa pagbitbit sini sang hayahay sang pungsod para sa nagahilapit nga boxing match.
”Ang mensahe ni Senator, simple… nga tapuson ta ang away, pagbalik ko da, blow by blow kita Mr. President. Ihatag ko sa imo ang audio video sang kurapsyon nga ginbilin koda sa tion nga matapos ang away sa August 21.”
Nahibaluan nga ginbaton ni Pacquiao ang hangkat ni Duterte nga pangalanan ang mga kurap nga ahensya sang gobyerno.
Bag-o magpadulong ang Senador sa Estados Unidos para sa iya training, ginbuyagyag niya nga wala na-account sang Department of Social Welfare and Development (DSWD) ang P10.4 billion nga balor sang nagkaladula nga pondo sang gobyerno para sa COVID-19 cash aid program.
Ginlaslasan man ni Pacquiao ang Department of Health bangud sa ginapahayag pagbakal sang ahensya sang mga expire nga bulong.
