Ginakabig sang isa ka social media personality kag commentator nga si Jeffrey ”Ka Eric” Celiz nga kaangay sang madulom nga hitabo sa Martial law ang tikang sang National Bureau of Investigation (NBI) nga pagpasaka sang ila sang kaso nga cyber libel kaupod ang anay journalist nga Jay Sonza sa gina-alegar nga pagpalapta sang peke nga medical information ni President Ferdinand Marcos Jr.
Sa interview sang Bombo Radyo kay Celiz, iya ginpahayag nga indi isa ka malisyoso nga topiko ang pagpahayag sang kahimtangan sang ikaayong lawas sang Presidente bangud ini ang Commander-in-Chief sang Armed Forces of the Philippines kag nagaserbe man bilang head of government kag head of state sang pungsod.
Suno sa iya, kinahanglan mahibaluan sang publiko kun may yara pa sang mental kag pisikal nga kapasidad ang Presidente agud magpadayon sa iya responsibilidad.
Gin-ako man sini nga wala ini nagpalapta sang gina-alegar nga medical report sang Presidente, kag ang iya mga pahayag nakabase lamang sa mga opisyal nga pahayag sang Malacañang pinaagi kay Palace Press Officer Undersecretary Claire Castro.
Ginpahayag pa ni Celiz, indi pribado nga tawo ang Presidente bangud may dako nga implikasyon sa national security concern kag national public interest ini.
Dugang pa sini, wala sang malain kun maghatag sang komento ang mga tawo sa nagakatabo sa gobyerno bangud kabahin ini sang demokrasya kag indi dapat pagpauntaton kag pahipuson paagi sa mga kaangay nga butang.
Nagpahanumdum man ini sa publiko nga mangin mabinantayon sa mga nagakatabo sa gobyerno bangud isa ini sa magamit sang mga ini agud mapakigbato ang ila kinamatarong kag ang hustisya nga kinahanglan sang mga Pilipino.
