Padayon pa ang imbestigasyon sang mga otoridad kun may kaangtanan ang brutal nga pagpatay sa isa ka anay drug suspect sa pagpatay man sa isa ka anti-drug operative sang Bacolod City Police Office (BCPO) sa Bacolod City.
Matandaan nga Martes sang gab-i, Agusto 31, sang nasapwan ang bangkay sang lalaki nga ginpugutan sang ulo sa Rosario Street, Barangay 38 — lugar kun sa diin man ginluthang-patay ang 37 anyos nga pulis nga si Police Staff Sgt. Joseph Nepomuceno.
Si Nepomuceno ang myembro man sang city drug enforcement unit (CDEU)
Ang ginpugutan naman sang ulo amo si Glenn Paul Castillo, 42, kag residente sang Barangay Cabug, Bacolod City.
Suno sa mga otoridad, nadakpan na sadto sa isa ka buy-bust operation nga ginpatigayon sang CDEU si Castillo.
May ginbilin pa nga mensahe ang mga suspek sa kilid sang utod-ulo sini nga bangkay.
Nasaad sa mensahe nga interes pa lang sa utang ang pagpatay sa lalaki.
Sa Barangay 2 nasapwan ang ulo ni Castillo sa diin suno sa mga nakakita, ginhulog ini sa karsada pila ka minutos matapos ginbilin ang bangkay sini sa Barangay 38.
Ginapahayag walo ka lalaki nga sakay sang duha ka salakyan ang naghaboy sa lawas sang biktima sa Rosario Street bag-o nabatian ang lupok sang pusil.
Ang nasapwan nga bangkay ang nakasulod sa sako, naka-posas, kag may mga igo na sang bala kag madalom nga pilas sa lawas.
Sa kaso naman sang pagpatay sa pulis nga si Nepomuceno, indi pa man matumod sang mga pulis ang suspek sa likod sang krimen.
