ILOILO CITY- Nagakadapat nga ikonsiderar sang mga nagabaligya sa tagsa ka merkado ang kaayuhan sang mga manugbakal.
Ini ang may kaangtanan sa pag retail sang isda sa Iloilo Fish Port Complex nga ginareklamo sang mga manugbaligya sa tagsa ka merkado sa syudad sang Iloilo.
Sa interview sang Bombo Radyo kay Alex Inosentes, Manager sa Iloilo Fish Port Complex, iya ginpahayag nga madugay na nga may yara sang pag retail sang isda sa sulod sang Fish Port.
Suno kay Inosentes, choice ukon deretso na sang manugbakal kun sa diin sila magabakal sang isda.
Ginpahayag ni Inosentes nga indi man mapilit ang mga manugbakal kun sa diin nila luyag nga magbakal.
Gin-athag man sang natungdan nga wala nagakumpitensya ang mga vendor sa Fish Port sa mga nagabaligya sa mga merkado.
Kun may yara sang mga reklamo suno kay Inosentes, nagakadapat nga iderekta ini sa iya bangud nakahanda man siya nga magsabat.
Mahimo suno sa natungdan nga manubo ang presyo sang mga isda bangud ginakabig nga bagsakan ang Iloilo Fish Port Complex.
Sa pihak sini, nakahanda siya suno kay Inosentes nga sundon kun ano man ang mangin mando sang Iloilo City Government.
