ILOILO CITY – Ginhatag na sa informant ang kabahin sang P1.1 million nga reward money nga patong sa ulo sang napatay nga top drug lord sa Western Visayas nga si Richard Prevendido.
Ang P500,000 nga ginhatag sa wala ginhingadlan nga mga informant, amu ang share sang Iloilo provincial government.
Ginpahayag sa Bombo Radyo ni Iloilo Provincial Police Office (IPPO) director S/Supt. Marlon Tayaba, isa sa mga informant ang taga-probinsiya sang Iloilo samtang ang isa naman ang gikan sa siyudad sang Iloilo.
Natakpan ang nawong sang duha ka informants sang ginpaatubang ang mga ini kay Iloilo Governor Arthur Defensor Sr. para batunon ang reward money.
Nahibaluan nga ang P500,000 nga kabahin sang reward money ang gikan sa Iloilo City government, samtang ang P100,000 ang gikan sa Police Regional Office 6.
Kadungan sang paghatag sang reward money sa mga informant, ginhatag man ni Gov. Defensor ang ginpangako nga P500,000 para sa operating team nga nag-neutralize kay Prevendido.
Ini ang ginalakipan sang mga katapo sang IPPO, Regional Intelligence Unit kag Iloilo City Police Office.