Nagalaom sa gihapon ang 20 anyos nga amputee kag gold medalist nga swimmer nga makabalik sa pag-eskwela kag maka-angkon sang career sa patag sang paglangoy.
Ang amputee amo ang mga indibidwal nga may utod nga kamot ukon tiil nga nagapasakop sa nanuhay-tuhay nga kompetisyon ukon hinampang kasubong kay Jhon Rey Amolar nga tumandok sang Janiuay, Iloilo nga nakadaog na sadto sa lamharon niya nga edad sang tatlo ka gold medal sa tatlo ka swimming events, bisan utod ang natuo sini nga tiil.
Kategorya nga Orthopaedically Impaired ang ginpasakupan sini sa Congressional District Sports Association sa Iloilo.
Nagserbe man siya nga inspirasyon sa madamo nga kabataan bangud bisan nadulaan siya sang tatlo ka myembro sang pamilya — iya ginikanan kag isa ka utod, maisog niya sa gihapon nga ginsalom ang mga pagpanghangkat nga nag-abot sa iya kabuhi.
Sa interview sang Bombo Radyo kay Jhon Rey, iya ginpahayag nga tuig 2012 sang nagtaliwan ang iya iloy bangud sa balatian nga cancer.
Bangud sa kapigaduhon, bisan 12 anyos pa lang, nagabulig-bulig na si Jhon Rey sa iya amay pinaagi sa pag-konduktor.
Tuig 2015 sang na-aksidente ang ginsakyan niya nga jeep nga amo rason sang pagka-utod sang isa niya ka tiil.
Suno kay Jhon Rey, ang iya amay nga nagakayod para sa ila nga mag-ululutod ang halos nagsuprer man sang depresyon sang amo nga tion bangud sa mga problema nga nag-abot sa ila pamilya.
Gin-ako man sang 20 anyos nga may mga bes man nga daw malunod na siya sa kasubo apang bangud sa laygay kag sa bulig sang iban nila nga himata, nasarangan pa niya nga padayunon ang iya pag-eskwela sa Special Education (SPED).
Apang wala pa isa ka-tuig matapos ang aksidente, sunod naman nga ginbawian sang kabuhi ang iya amay bangud sa balatian nga asthma.
Pahayag ni Jhon Rey, preska pa ang sakit sa iya dughan bangud sang pagtaliwan sang iya amay sang nag-compete siya sa swimming event sa kategorya nga freestyle, backstroke kag breaststroke.
Sang amo nga tion suno sa iya, kasubong nga daw malunod siya sa kasubo bangud sa asud-asud nga trahedya sa iya kabuhi.
Apisar sini, nadag-an sa gihapon ni Jhon Rey ang tatlo ka kategorya nga iya ginpasakupan kag ginhalad pa ang iya nadag-an nga medalya sa iya nagtaliwan nga amay.
Sa subong, gin-ako ni Jhon Rey nga nag-untat anay siya sa iya pagtuon, amo man sa pag-intra sa mga swimming competition bangud man sa kapigaduhon.
Apang suno sa iya, kun may tyansa nga makabalik siya sa pagtuon, handom gid niya nga tapuson ini agud malab-ot ang iya handom nga mangin isa ka swimming instructor.
Dugang pa niya, bisan madamo man ang nadula sa iya, wala naman nadula ang iya paglaum kag pagtuo agud magpadayon sa kabuhi.
Nahibaluan nga 82 tanan ka gold medal ang nadag-an sadto ni Jhon Rey sa iya swimming events sa palarong pambansa.
