POTOTAN, ILOILO – Nailo sa amay kag iloy ang tatlo ka lamharon nga kabataan nanday Emil kag Merren Pagtolon-an, ang mag-asawa nga sakay sang Sports Utility Vehicle (SUV) nga nakabunggo sa ten-wheeler truck sa Barangay Amamaros, Pototan, Iloilo.
Ang nasambit nga mag-asawa nga lunsay 36 anyos ang residente sang Barangay Bagacay, Passi City.
Nalab-utan pa sang duha ka oras kaina sang hapon antes makuha sang rescue groups ang lawas sang bana sa salakyan kag apisar una nga nakuha ang lawas sang asawa, wala gid nahingagaw kag lunsay ginbawian sang kabuhi antes pa man nakaabot sa pinakamalapit nga ospital.
Sa interview sang Bombo Radyo kay Ryan Palomillo, tiyo sang mga biktima, iya ginpahayag nga nagatrabaho bilang maestra sa elementary school sa Barangay Jaguimitan sa Passi City si Merren.
Nagatrabaho naman bilang seaman si Emil apang pila ka bulan naman umpisa sang nanaug ini sa barko bangud nagpaidalom ini sa operasyon sa iya nga ulo apang ‘naka-recover naman’. Ginapahayag nga indi na kuntani ini magbalik sa trabaho sa lawod bangud nagaplano na sila sang iya asawa nga magnegosyo sa syudad sang Passi.
Suno sa tiyo, ang mga kabataan sang mga biktima ang nagaedad subong sang 7 ka tuig, 4 ka tuig, kag 2 ka tuig.
SANTO SA IMBESTIGASYON SANG PULIS
Posible pasakaan sang kaso nga Reckless Imprudence Resulting to Double Homicide and Damage to Property ang driver sang 10-wheeler truck nga si Regent Albacete, 20, residente sang Hibao-an Sur, Mandurriao, Iloilo City.
Sa interview sang Bombo Radyo kay Police Staff Sergeant Raffy Gonzales, traffic investigator sang Pototan Municipal Police Station, iya ginpahayag nga halin sa Iloilo City kag padulong na sa Passi City ang direksyon sang SUV samtang halin naman sa Passi City kag padulong sa Iloilo City ang direksyon sang ten-wheeler truck.
Santo sa imbestigasyon sang pulis, sang yara na sa Barangay Amamaros sa Pototan, nag-overtake ang SUV sang mag-asawa sa isa ka salakyan apang naalang-alangan ini bangud gulpi lang nasumalang ang truck.
Suno kay Gonzales, naglikaw si Albacete kag ginwarik ang truck padulong sa lane nga iya gid sang SUV (sa wala), apang naglikaw man ang SUV kag nagbalik liwat sa iya gid nga lane rason nga naglab-utanay gid ang duha ka salakyan kag natabo ang head-on collision.
Ginapahayag nga maayo man kuntani ang intensyon sang truck driver sa paglikaw apang posible nga nataranta lang rason nga natabo ang head-on collision kag ‘almost totally-wrecked’ gid SUV kag wasak man ang nauna nga bahin sang truck.
SANTO SA PAHAYAG SANG PAHINANTE NGA KAUPOD SANG DRIVER SA TRUCK
Mahinay kag matawhay ang dalagan sang truck.
Ini naman ang depensa ni Joery Teves, ang pahinante nga kaupod sang driver sang ten-wheeler truck.
Sa interview sang Bombo Radyo kay Teves, iya ginpahayag nga ‘gulpi’ lang naghalin sa iya nga lane ang SUV bangud nag-overtake ini sa wing van.
Sang nakita sang driver sang truck nga masugataay sila sang SUV, ginwarik sini ang truck padulong sa wala nga lane (lane sang SUV), bangud kun sa tuo [nga lane] sini iwarik ang ginamaneho nga truck, mabungguan sini ang isa ka motorsiklo nga may angkas pa nga isa ka bata.
Ini ang ginapatihan ni Teves kun ngaa ginpili sang driver nga sa wala [nga direksyon] ginkabig ang truck apang didto man nagbalik ang SUV rason nga natabo ang aksidente.
Ginpahayag nga nakaangkon man sang samad sa lawas ang driver sang truck gani gindala man ini sa ospital.
Natalana pa nga mag-istorya ang pamilya sang mga biktima sa mga pulis may kaangtanan sa mangin dalagan sang kaso. #
