Nagpanawagan si Kabataan Party list Representative Raoul Manuel sa Commission on Elections (COMELEC) nga maghimo sang manual nga pag-isip sang boto agud masiguro ang integridad kag masaligan nga total votes sa 2025 midterm election.
Sa interview sang Bombo Radyo kay Manuel, iya ginpahayag nga nagapanawagan siya sang parallel manual vote counting bangud sang madamo nga impormasyon angut sa mga aberya nga natabo sa mga automated counting machines (ACMs) sang eleksyon.
Suno kay Manuel, indi makatarungan ang resulta sang eleksyon, gani ginahingyo nila ang publiko nga magprotesta batok sa resulta sang national and local election.
Samtang ang iban sa mga kandidato kag partido politikal nagbaton sang resulta sang eleksyon, apang ang Kabataan Partylist padayon nga nagapanawagan sang manual counting bangud sa gina-alegar nga anomalya sa 2025 midterm elections.
Ginpunto man ni Manuel nga isa sa mga isyu amo ang ginpatigayon nga last minute software update sa mga makina kun sa diin isa ini ka makaduluda.
Nagpanugyan man si Manuel nga kinahanglan gid anay usisaon ang mga teknolohiya nga ginagamit sa eleksyon, kag ini gid dapat ang tagaan sang igtalupangod agud malikawan ang pagpangdaya.
Sa subong, ginahulat pa ang sabat sang COMELEC sa panawagan.
