𝗠𝗔𝗡𝗜𝗟𝗔 — Gintawag nga “delulu” ukon delusional sang Kabataan Partylist si Bise Presidente Sara Duterte sa pagbutang sang iya kaugalingon nga “designated survivor” kasunod sang pag-anunsyo niya nga indi mag-attend sang State of the Nation Address (SONA) ni Presidente Ferdinand Marcos Jr. subong nga tuig.
Suno kay Kabataan Partylist Executive Vice President Renee Louise Co, ang gin-akto ni Duterte ang isa ka delulu (slang para sa delusional) nga pamatasan.
Ginpahayag man ni Co nga indi si Duterte ang alternatibo ukon backup leader kon ang legasiya nga iya napamatud-an sa mga Pilipino amo ang iya confidential funds racket kag ang linibo ka mga biktima sang peke nga inaway sang iya pamilya sa droga.
Dugang pa ni Co, isa ka politiko si Duterte nga luyag mangin ‘main character’, nga nagapresentar sang iya kaugalingon bilang oposisyon, apang indi niya mainto ang bisan sin-o bangud nagapati ini nga isa ini ka drama sa tunga sang magkaribal nga mga dinastiya kag mga paksyon sang ruling class.
Gin-athag man sini nga ang matuodtuod nga mga lideres ang pirme nagapakita sa pagsabat sang panawagan sa pag-alagad sa mga tawo, kag indi ini nagakabagay sa ila nga mga may ambisyon sa politika.
Nahibaluan nga ang “designated survivor” isa ka opisyal sang gobyerno sang Estados Unidos nga ginpili nga magtener sa isa ka luwas nga lokasyon sa tion sang mga hitabo, kon sa diin, ang mga nagapanguna nga lider ang nagatipon. Ginapasiguro man sini ang pagpadayon sang gobyerno sa tion nga ang isa ka makahalalit nga hitabo makapatay ukon makadula sang ikasarang sa presidente, bise presidente, kag iban pa nga mataas nga mga opisyales.
Wala naman sang ginhatag nga rason ukon paathag si Duterte kon ngaa ginpili niya nga indi mag-attend sang ikatlo nga State of the Nation Address ni Marcos sa Hulyo 22.
Kun matandaan, sang nagligad nga bulan, naghalin si Duterte bilang hepe sang Department of Education (DEPED) kag vice chair sang National Task Force to End Local Communist Armed Conflict (NTF-ELCAC).
Ang iya pagbiya sa nasambit nga departamento ang maga-epekto sa Hulyo 19, samtang si Senador Sonny Angara naman ang magatal-os sa iya bilang sekretaryo sang edukasyon.
