Nasekyar na sang Iloilo City Engineers Office ang kable kon sa diin nakuryente ang isa ka lalaki sa Center Island sang General Luna St., Iloilo City Proper.
Ang biktima amo si Danny Boy Glumalid, residente sang Barangay Sinikway, Lapuz, Iloilo City.
Sa interview sang Bombo Radyo kay Mr. Joel Gerasmia, Electrical Inspector II sang City Engineers Office, iya ginpahayag nga underground ang mga wires nga yara sa lugar kon sa diin, nakalubong ini sang one-foot ukon isa ka tapak.
Suno kay Gerasmia, ginpanglubong ang mga kable bangud may mga insidente nga ginakawat ini kag ginabaligya.
Gin-athag man sini nga ang pila ka underground wire sa Esplanade ang mas madalom nga ginlubong kon ikumpara sa Center Island sa amo nga dalan.
Nagapati man ang natungdan nga namentenar sang ila talatapan ang mga wire sa lugar bangud sa nagligad nga Dinagyang Festival, wala man sang may nasamaran ilabi na sa mga nagalabay sa lugar.
Nagpanindugan man si Gerasmia nga nahunos lang ang linya sini (live wire) rason nga naglabaw kag naglapat ini sa alambre nga nakaptan sang biktima.
