Gin-withdraw ni former Barotac Nuevo Sangguniang Bayan Member Jess Dimafiles ang iya kandidatura sa pagka-SB member subong nga tuig bangud wala nagasanto ang iya ginasuportahan nga presidential candidate sa kandidato nga ginasuportahan sang iya nga partido.
Si Dimafiles ang kabahin sang slate sang Nacionalista Party sa banwa sang Barotac Nuevo, Iloilo, apang kilala man siya kag ang iya pamilya nga supporters ni presidential candidate Vice President Leni Robredo.
Sa interview sang Bombo Radyo kay Dimafiles, iya ginpahayag nga sa walo sila nga kandidato sang Nacionalista sa pagka-SB member, siya lang ang nagasuporta kay Robredo bangud lunsay si former Senator Bongbong Marcos ang kandidato sang iya mga kaupdanan.
Sang damlag lang suno sa former SB Member, gin-require siya sang ila nga political leader nga mag-post sang suporta para kay Marcos.
Ang ginatumod nga political leader amo si former 4th District Rep. Dr. Ferjenel Biron nga kandidato man sa pagka-congressman subong nga tuig.
Suno kay Dimafiles, bisan nga nagalain ang iya nga buot kag mabudlay para sa iya nga prinsipyo, nagtuman siya sa requirement kag nag-post sa social media nga suportado niya si Marcos.
Apisar sini, ginkakas gihapon si Dimafiles sa ila nga partido.
Kahapon, Marso 4, ginapahayag nagtakod sang tarpaulin ang iya nga ka-partido, wala nalakip ang iya nga picture, kag nakumpirma nga wala na siya sa grupo.
Ginpahayag sini nga bisan may option man ini nga magpadalagan bilang independent candidate, nag-desisyon na lang ini nga mag-isol sa eleksyon kag i-tutok ang iya nga tyempo agud nga magkampanya para kay Robredo.
Plano ni Dimafiles nga mag-upod na lang sa mga volunteer groups nga nagasuporta sa presidential bid ni Robredo.
