ILOILO CITY – Nagdangat sa kabug-usan nga ₱10.6 million ang gin-award sang Philippine Olympic Committee sa mga medal winners sa Hangzhou 19th Asian Games sa ginpatigayon nga general assembly sa Parañaque City.
Ang Pilipinas ang nakadaog sang duha ka mga golds, duha ka mga silver kag 12 ka mga bronze nga may kabug-usan nga 18 ka mga medalya.
Lakip sa mga personal nga nagbaton sang incentives amo sanday jiu-jitsu gold medalist Annie Ramirez, nga nakakuha sang P1 million, kag boxing silver medalist Eumir Felix Marcial, nga nakabaton naman sang ₱500,000.
Si Philippine Olympic Committee athletes commission head Nikko Huelgas ang nagbaton sang ₱1 million check sang pole vault champion kag record holder Ernest John “EJ” Obiena samtang ang bonus para kay Meggie Ochoa ang ginkuha naman sang iya kaangay nga jiu-jitsu athletes.
Nakabaton naman sang tag-₱200,000 ang myembro sang gold medal-winning men’s basketball team.
