ILOILO CITY – Ginpatpat sang masami nagakadto sa Las Vegas, Nevada ang pangabuhi sang mga nagasugal sa mga casinos sa ginakabig nga entertainment capital sang kalibutan nga Las Vegas, Nevada.
Sa exclusive interview sang Bombo Radyo kay anay Philippine Sports Commission (PSC) Chairman kag anay Bacolod City Rep. Monico Fuentevella, ginpahayag sini nga ang suspek nga si Stephen Paddock ang ginakabig nga high roller gambler.
Nagakahulugan ini suno kay Fuentebella nga mahimo ini makaistar sa ginakabig pinakamatahom nga suite sa mga hotels sang mga casinos sa diin libre man ang pagkaon kag ilimnon.
Pamaagi man ini suno kay Fuentebella sa pag-amuma sang mga may kwarta ilabi pa nga kilala na sang mga ini ang kaangay ni Paddock nga nakahanda maggasto sang minilyon sa casino.
Nagapati man si Puentevella nga nalubong sa utang si Paddock rason nga nahimo sini ang magpangluthang sa Las Vegas.’
Suno kay Fuentebella nga masami man nagapadulong sa Las Vegas agud mag-cover sang boxing matches ni Sen. Manny Pacquiao, madamo na ini sang nahibaluan sa mga pagdumalahan sang mga casino sa diin sa una nga pagbisita sang mga manugsugal, daw kaangay nga ginapadaog nila ini.
Apang ang matuod sa amu nga industriya suno kay Fuentebella nga ginakontrol ini sang mafia sa diin madamo sang mga manugsugal ang nagakadulaan sang kwarta, balay kag palangabuhian sa pagkalulong sa sugal.
Ginhalimbawa man ni Fuentebella ang ginhimo nga pagpangluthang sang isa man ka high roller nga suspect sa Resorts World Manila sa diin posible na-bankrupt ini rason nga nagpangdalahig na lang sang iban pa nga mga inosente.